Lei Molac : comunicat de premsa del CREO
LENGADOCIAN :
La lei Molac, una escasença per l'ensenhament de l'occitan.
Lo CREO Tolosa, associacion dels ensenhaires d'occitan, se regaudís de l'adopcion de la lei en favor de las lengas regionalas, lo dijòus 8 d'abrial 2021.
Delà de realas avançadas istoricas que permeton la reconeissença d'una senhaletica francés-occitan dins nòstra region, lo drech de donar un prenom occitan en respectant l'ortografia normalizada, los progrèsses son vertadièrs per l'ensenhament de l'occitan dins nòstra acadèmia mondina.
Un prètzfach escolar per las Calandretas
La lei permet a un enfant que demòra dins una comuna, ont l'occitan es pas ensenhat, de beneficiar d'un prètzfach escolar per anar dins una Calandreta. Las municipalitats qu'an pas d'escòla bilingua, deuràn balhar un budgèt pels dròlles d'aquelas escòlas associativas.
Un ensenhament en immersion
La lei daissa la possibilitat a las escòlas de proposar un ensenhament immersiu, sens un caractèr obligatòri e sens prejudici per l'aquisicion del francés. S'agís d'una tresena via, en parallèl de l'ensenhament public bilingüe. Una bèla part dels aprendissatges se fa dins una sola lenga, l'occitan e lo francés s'introdusís progressivament. Aital, lo dròlle es perfièchament bilingüe a la fin del primari. Aquel sistèma existís ja en cò nòste, fòra de l'ensenhament public, amb las Calandretas.
L'aprendissatge de la lenga occitana proposat a totes
Totes los escolans d'Occitània, qu'o desiran, poiràn aprene l'occitan d'ara enlà. La lenga dels trobadors es ofèrta a totes e ven donc una matièra opcionala e facultativa, dins l'encastre de l'orari normal d'ensenhament. Es per nosautres la mesura pus fòrta que permetrà d'afortir l'ensenhament de l'occitan que coneis un vertadièr afògament de nòstres joves.
GASCON :
La lei Molac, ua escadença entà l'ensenhament de l'occitan.
Lo CREO Tolosa, associacion deus ensenhaires d'occitan, que's hè gai de l'adopcion de la lei en favor de las lengas regionaus, lo dijaus 8 d'abriu 2021.
Au delà d'avançadas reaus e istoricas qui permeten l'arreconeishença d'ua senhaletica francés-occitan dens la nòsta region, lo dret de dar un prenom occitan en arrespectar l'ortografia normalizada, los progrès que son vertadèrs tà l'ensenhament de l'occitan dens la nòsta academia tolosana.
Un prètzhèit escolar tà las Calandretas
La lei que permet a un mainatge qui demora dens ua comuna, on l'occitan n'ei pas ensenhat, de beneficiar d'un prètzhèit escolar tad anar dens ua Calandreta. Las municipalitats qui n'an pas d'escòla bilingua, que's haràn hrèita de dar un budget taus còishos d'aqueras escòlas associativas.
Un ensenhament en immersion
La lei que dèisha la possibilitat a las escòlas de perpausar un ensenhament immersiu, shens un caractère obligatòri e shens prejudici tà l'aquisicion deu francés. Que s'ageish d'ua tresau via, en parallèle de l'ensenhament public bilingüe. Ua bèra part deus aprenedissatges que's hè dens ua sola lenga, l'occitan e lo francés que s'introduseish progressivament. Atau, lo mainatge qu'ei perfèitament bilingüe a la fin deu primari. Aqueth sistèma qu'existeish dejà per nòste, dehòra de l'ensenhament public, dab las Calandretas.
L'aprenedissatge de la lenga occitana perpausat a tots
Tots los escolans d'Occitania, qui ac desiran, poderàn apréner l'occitan d'ara enlà. La lenga deus trobadors qu'ei auhèrta a tots e que vad donc una matièra opcionau e facultativa, dens l'encastre de l'orari normau d'ensenhament. Qu'ei tà nosautes la mesura mei hòrta qui permeterà d'ahortir l'ensenhament de l'occitan qui coneish un vertadèr balanç deus joens de nòste.