L’Ofici public de la lenga occitana lança una novèla campanha dedicada a la promocion de l’ensenhament de l’occitan al collègi .

L’ensenhament escolar de la lenga occitana es un canal màger de transmission de la lenga. Dins aquel contèxte, l’Ofici es missionat per l’Educacion nacionala atal coma las Regions Novèla-Aquitània e Occitània per sensibilizar los escolans e las familhas al costat dels actors de l’ensenhament, sus l’interès de l’aprendissatge de l’occitan d’un punt de vista personal e collectiu.

Per fin de respondre als besonhs identificats sul terren, pilotèt la produccion d’un desplegant comun per sensibilizar als atots de l’aprendissatge de l’occitan al collègi, en consultant largament sos partenaris (representants del còs ensenhaire e dels rectorats, associacions especializadas…). Aquel document compila las divèrsas modalitats d’ensenhament a-n-aquel nivèl. Al delà d’una difusion al prèp del public pertocat, en partenariat amb l’Educacion nacionala, l’Ofici desira prepausar a totes, ensenhaires, actors associatius, collectivitats, parents d’escolans, de se’n emparar. 

L’Ofici desira perseguir la siá accion dins aquel sens, en desplegant d’aisinas de comunicacion suls diferents nivèls d’aprendissatge (escòla, licèu…).

Per obtenir “L’occitan al collègi” en version papièr, podètz contactar l’Ofici per corric o alara telecargar la version numerica en clicant aquí.