Municipalas tolosanas : lo bilingüisme fa l'unanimitat
Lo 4 de mars, las quatre listas en liça per las municipalas tolosanas an respondut a las questions d'un centenat de personas vengudas assistir a un rencontre-devisada a l'Ostal Palladia. Cada candidat o representant(a) del cap de lista a explicat sa vision de la lenga e de la cultura occitanas a Tolosa avant de ne venir a de proposicions concretas. Mossur Pierre Cohen (lista Générations) a volgut soslinhar la necessitat de redreçar los budgets mercés a de programas « sanctuarisats ». Aqueste s'es engatjat a sostenir l'ensenhament bilingüe atal coma l'ensenhament immersiu. Meteissa canta del costat de Jiròni Frare (representant Dòna Nadia Pellefigue, candidata socialista) que la lista vòl desvolopar los malhums bilingües e immersius. Mossur Antoine Maurice (Archipel citoyen) a rapelat el qu'amb los colistièrs an pas « l'occitan vergonhós ». Serà lo sol, al cors de la serada, a suggerir un engatjament chifrat de desvolopament de las escòlas bilingüas, a rason d'una filièra per an. Monsur Jean-Michel Lattes, primièr adjunt de la municipalitat sortenta, a doncas fait lo bilanç pel compte de Monsur Jean-Luc Moudenc (Les Républicains). N'a profeitat per anonciar l'obertura de la filièra bilingüa tolosana que ven. Serà installada al dintre de las escòlas TOEC e Marcel Pagnol, barri de la Cartochariá.